Maqola yozishdagi qoidalar quyidagilar:

1. Maqola o'zbek tilida bo'lishi lozim. 

2. Maqolada aniq bir IT sohasiga oid mavzu yoritilgan bo'lishi, o'quvchilar uni o'qiganda o'zlariga yangi bilim yoki tajriba olishlari zarur.

Bu punktga ko’pchilik maqolalar to’g’ri kelmayapti. 4 ta qator yozuv yuzlab skrinshot rasmlari bilan maqola tayyorlab yuborilmoqda. Maqolada avval qisqacha kirish qismini anglatuvchi satr bo’lishi kerak. Keyin maqolaning ichki asosiy qismi. Maqolani chap tomonga tekislab yozing. Rasmlarning izohlari rasmdan so’ng pastda o’rtada yozing. Asosiysi maqolada yangicha ma’no-mazmun bo’lsin, yoki o’qigan o’quvchi birorta tajriba o’rgansin. Deylik, siz qiyinroq funksiyani qanday kodlar orqali bajarilishini maqola sifatida yozdingiz. Unda shunchaki kodlarni yozib qo’ymang, har bir kodni izohlang, misollar keltiring. Maqolaning mazmuni juda muhim hisoblanadi. Maqolaning so’nggida xulosaviy fikrlar satri bo’lishi shart. Oxiri mavhum yakunlanib qolgan, fikr tugallanmagan maqolalar qabul qilinmaydi.

3. Maqolada foydasiz linklar bo'lishi mumkinmas.

Maqolangizda foydali manbalarni ko’rsatishingiz mumkin, albatta. Masalan Githubdagi kodlarga link va boshqa shunga o’xshash foydali manbalar. Lekin umuman axborot texnologiyalariga aloqasi yo’q, yoki maqoladagi mavzudan butunlay chetlashgan, yoki reklama sifatida yozilgan linklar mavjud maqolalar qabul qilinmaydi. Har bir linkni maqsadli tarzda joylashtiring.

4. Imlo xatolari ko'p bo'lgan maqolalar chop etilmaydi.  

Ma’no-mazmun yaxshi yozilgan maqolada orfografik xatolar bo’lishi esa maqolaning saviyasini tushiradi. To’g’ri, xatosiz matn yozishga o’rganing. Maqola matnida grammatik ham, orfografik ham xatolar bo’lmasin, umuman. Ba’zi maqolalarda ma’no juda yaxshi yoritilgan, lekin orfografik xatolar ko’pligi uchun ma’qullanmasdan qaytarib yuborildi. Imlo xatolarini to’g’rilashda internet saytlarida orfografik xatolarni aniqlash saytlaridan foydalanishingiz mumkin. Erinmang, hamma so’zlarni to’g’ri yozganingizga ishonch hosil qilgandagina maqolani yuboring. 

5. Maqola boshqa manbadan to'g'ridan to'g'ri ko'chirilgan bo'lmasligi kerak.

Maqolani qaysidir chet el manbasidan olsangiz uni tarjima sifatida e’lon qilib chop etishingiz mumkin. Agar uni o’zingiz yozmagan bo’lsangiz-u, lekin o’zingiz yozganingizni ta’kidlasangiz bu plagiat hisoblanadi. Shunchaki o'zbek tilidagi maqolalarni nusxalab olib chop etishingiz plagiat hisoblanadi. Plagiat maqolalar chop etilmaydi (shu kungacha chop etilganlari ham o'chirib tashlanadi). Maqolada yangi fikrlarni ko’proq yoritishingizni maslahat beraman. Yana shuni unutmang, maqolada yozilgan faktlarning to’g’riliga muallif javobgar bo’ladi.

6. Maqolalarga qo'yilgan teglar mavzuga mos kelishi zarur.

Maqolalar mavzularini e’tiborsizlarcha tanlamang. Masalan maqolangizda Androidga oid hech qanday so’z ishlatmasdan unga Android tegini qo’shib qo’yishingiz tufayli ham maqolangiz chop etilmaydi.

 

Shu qoidalarni yaxshilab o’qing va qoidaga amal qilgan holda maqolani yuboring. Qoidalarning birorta bandiga to'g'ri kelmaydigan maqolalar chop etilmaydi!